ភ្នំពេញ៖ សម្ដេចព្រះមហាក្សត្រី ព្រះវររាជមាតា នរោត្តម មុនីនាថ សីហនុ បានសព្វព្រះរាជហឫទ័យប្រទានព្រះរាជសារកោតសរសើរចំពោះការដឹកនាំរបស់លោកស្រី ពេជ ចន្ទមុន្នី ដឹកនាំសមាគមកាយរិទ្ធនារីកម្ពុជាទទួលបានជោគជ័យលើឆាកអន្តរជាតិនាំឲ្យកម្ពុជាក្លាយជាប្រទេសម្ចាស់ផ្ទះនៃសន្និសីទសមាគមកាយឫទ្ធិនារីពិភពលោកលើកទី៣៩ នៅឆ្នាំ២០២៦។
ក្នុងព្រះរាជសារឡាយព្រះហស្ថលេខាថ្ងៃទី៤ សីហា ឆ្នាំ២០២៣ សម្ដេចព្រះមហាក្សត្រី បានចូលរួមអបអរសាទរ និងកោតសរសើរយ៉ាងកក់ក្តៅ ចំពោះលទ្ធផលខាងលើនេះ ក្រោមការដឹកនាំរបស់លោកស្រី ពេជ ចន្ទមុន្នី និងមានជំនឿយ៉ាងមុតមាំថា សមាគមកាយឫទ្ធិនារីកម្ពុជា នឹង សម្រេចបាននូវជោគជ័យថ្មីៗថែមទៀត ក្នុងការរួមចំណែកអភិវឌ្ឍន៍ប្រទេសជាតិ។
គួរឲ្យដឹងដែរថា ក្រោមការខិតខំប្រឹងប្រែងរបស់លោកស្រី ពេជ ចន្ទមុន្នី ហ៊ុនម៉ាណែត អគ្គស្នងការសមាគមកាយឫទ្ធិនារីកម្ពុជា ប្រទេសកម្ពុជាត្រូវបានទទួលជ័យជំនះក្នុងការធ្វេីជាម្ចាស់ផ្ទះក្នុងការរៀបចំសន្និបាតសមាគមកាយប្ញទ្ធិនារីពិភពលោក លើកទី៣៩ នៅឆ្នាំ២០២៦ កាលពីថ្ងៃទី៣១ ខែកក្កដា ឆ្នាំ២០២៣ ក្រោមសំឡេងហ៊ោកញ្ជ្រៀវ ជាមួយនឹងការលើកទង់ជាតិកម្ពុជាពេញសាលប្រជុំ បន្ទាប់ពីគណកម្មការវាយតម្លៃប្រកាសឈ្មោះប្រទេសកម្ពុជា។
គោលបំណងនេះគឺដើម្បីបង្ហាញពីមោទនភាព និងការរួចរាល់ក្នុងការដាក់កម្ពុជាជាប្រទេសម្ចាស់ផ្ទះសម្រាប់សន្និសីទពិភពលោកកាយឫទ្ធិនារីពិភពលោកលើកទី៣៩ ឆ្នាំ២០២៦ នៅខេត្តសៀមរាប ទីក្រុងច្រកទ្វារតូចមួយទៅកាន់ប្រាសាទអង្គរវត្តជាបេតិកភណ្ឌពិភពលោក៕
